VIII Fizmat Elementary Math Olympiad (FEMO) халықаралық олимпиадасының қысқы кезеңі

FEMO (Fizmat Elementary Math Olympiad) — Республикалық физика-математика мектебі мен Астана қаласындағы Fizmat Academy жүзеге асырып отырған авторлық халықаралық білім жобасы. Биыл бұл олимпиада сегізінші рет өткізілді.

Олимпиада бір мезетте әлемнің 17 елінде және Қазақстанның барлық өңірінде ұйымдастырылды. Атап айтқанда, жарысқа Австрия, Әзербайжан, Беларусь, Германия, Грузия, Қытай, Қырғызстан, Коста-Рика, Малайзия, Ресей, Сауд Арабиясы, Тәжікстан, Түркия, Ұлыбритания, АҚШ және Өзбекстан мемлекеттерінің оқушылары қатысты. Жалпы қатысушылар саны 4 мыңнан асты.

Олимпиадаға жарыс талаптарына сәйкес 1–6 сынып оқушылары қатысты. Қатысушыларға математика пәнінен 10–15 тапсырмадан тұратын есептер ұсынылды. Барлық тапсырмалар оқушылардың жас ерекшеліктеріне сай, жеңілден күрделіге қарай жүйелі түрде әзірленген. Олимпиада әр елде жергілікті білім беру ұйымдарының базасында өткізіліп, барлық қатысушыларға тең мүмкіндік берілді.

FEMO халықаралық олимпиадасы тапсырмаларының сарапшысы, математика ғылымдарының PhD докторы Алмас Мұхамбетұлы Кунгожин олимпиаданың маңызын ерекше атап өтті:

«Аталған білім сайысының негізгі мақсаты — жас математиктердің логикалық ойлау қабілетін дамыту, шығармашылық әлеуетін арттыру және математикаға деген қызығушылығын күшейту. Сонымен қатар олимпиада оқушылардың білімін халықаралық деңгейде сынап, тәжірибе жинауына мүмкіндік береді».

FEMO халықаралық олимпиадасы үш кезеңнен тұрады.

• Қысқы кезең — желтоқсан айында,

• ІІ кезең — 2026 жылғы 1 наурызда,

• Қорытынды финал — 2026 жылғы 1 маусымда Түркия елінде өтеді.

Алғашқы екі кезеңнің қорытындысы бойынша үздік нәтиже көрсеткен оқушылар халықаралық финалға жолдама алып, өз мемлекеттерінің намысын қорғайды. Айта кету керек, қысқы кезеңге қатыса алмаған оқушылардың көктемгі турға тіркелу мүмкіндігі бар.

VII FEMO халықаралық олимпиадасының қорытынды кезеңі Әзербайжан елінде өтіп, оған 10 мемлекеттен 500-ге жуық оқушы қатысқан болса оның 300-ге жуығы — қазақстандық шәкірттерді құрады.

«FEMO халықаралық олимпиадасы жас дарындардың білімін ғана сынап қоймай, халықтар арасындағы достықты нығайтуға да зор үлес қосып келеді».